年年考第一不代表一切　鄭丹瑞︰我見過前半生考第一後半生考第尾的人

「問大家幾個問題。」好事之徒在損友吹水大會上發問：「在座各位讀書的時候，有無考過第一？」

十幾個損友當中，大概有一半人舉手，包括我。但為了澄清我一些疑問，我問好事之徒：「我小學二年班上學期考過第一，下學期考第十，半個學期算唔算數？」好事之徒惱我攪局，不理睬我，繼續發問：「大家有無連續試過五年考第一？」

在坐一眾本來舉手的損友，幾乎都放下手，只剩下損友甲和損友乙兩個：「我由小學一年班起，到小學六年班都考第一。」「Me too！」損友乙說。

「咁我想問從來未考過第一的損友，你們同唔同意一個人叻唔叻，同佢係咪年年考第一有直接關係？」一眾未考過第一的損反紛紛雀躍回應：「梗係無關啦！」「年年考第一，只係代表你識得考試，唔代表你踏入社會接受考驗的時候，一樣可以考第一！」

讀書時期，個個學期考試成績都包尾，幾乎被踢出校的損友丙最有資格發言，因為今時今日，他已經是一間上市公司的CEO，運籌帷幄，年年為公司賺大錢，而最為人津津樂道的，是他從來不聘請考第一的新人：「幾乎個個都淨係識得讀死書，死讀書！應付考試、應付multiple choice就叻，呢種人，一加一永遠只能等於二，完全唔識轉彎。」

損友丙也許比較偏激，我未必完全認同，但我又確實見過不少前半生考第一，後半生考第尾的人。

原文刊於《經濟日報》專欄「依然快樂」，原題為「考第一」。